EL PAÍS DE LA DERROTA

Voi construyir un país
nesta piedra
Un país fechu de desertores,
De profesionales de la renuncia,
Qu’acueya a tolos que nunca
Saben tar a l’altura de les circunstancies.

[Va ser] un país llenu de decisiones
Ensin tomar o siempre enquivocaes,
Onde nin se t’ocurra tener la esperanza
De topar una persona bona
O un actu d’arrogancia o filantropía

Van tar prohibíos los confesionarios
Porque la culpa ta prohibida
Van tar agnósticos los beatos
porque la muerte nun va ser vida

Esti país nun va tener bandera,
Que pa eso lu construyo yo
Y tampoco himnu, vamos
Tar demasiao borrachos
Como pa recordalu.
Y les llendes, les llendes sois vosotros.